கவிதை

ஊசலாடும் நேயங்கள்

பெருவிரைவு இரயில்
தூரத்தில் அசையும் போதே
எறும்புகளாய் ஊருகிறோம்

உள்ளிருப்பவன் வெளி சுவாசம்
எதிரலையாய் உள் சுவாசம்

ஒருவர் முதுகில் ஒருவர்
மனம் மட்டும் அந்நியமாய்
தொலைகிறது

இடம்தேடி
அலையும் விழிகள்
கயல்களாய்....
இல்லையெனில்
கொக்கின் தவம்

கைத்தொலைப்பேசியில்
கலையும் முகங்கள்

பி.எஸ்.பி.யில்
வெற்றுலகப் பிரவேசம்..

மடிக்கணினியில்
உலகச்சுற்றுலா...
அவசர அலுவல்கள்...

அருகில் துணை
சின்னதாய்
ஒரு தேடல்...
சில தொடுதல்கள் (நெருடல்கள்)
காதல் மாயையில்
பூப்பெய்யும் 

பல மொழிகள்
ஈரச்சந்தையாய்
காதில் விழுகின்றன..
நமது மொழி
நமக்கே மறந்துபோகிறது

சில தரவுகள்
பல பதிவுகள்
இங்கு
ஒவ்வொரு விநாடியும்
புதிதாய்ப் பூக்கின்றன

புறங்கள்
அழகாகிச் சிறக்கின்றன
அகங்களின் சருகுகளாய்
மனித நேயங்கள்.

                                   - சேகர்கவிதன்

மீட்பு
காலப் பிளவுகளில்
வீழ்த்தப்பட்ட ஞாபகங்களை
மீள்பார்க்க கிளம்புகிறது மனம்

தினத் தற்கொலை
காலங்களின் முதுகில்
சவாரி செய்கிறது

பாதங்கள் பதிந்த
தடங்களின் மேல்
சுவடுகளைத் தேடுகிறது

வாழ்க்கைப் புதரின்
சிக்கல்களைத் துரத்தி
பதிவுகளைப் பகர்கிறது

இரவு தூக்கத்தின்
கனவுபடங்களின் உள் பாய்ந்து
மகிழ்வுகளைத் தூவுகிறது

விழித் தூறல்கள்
கை கட்டி காத்திருக்கின்றன
திறந்த கிணற்றுக்குள்

நடந்து வந்த பாதையில்
திரும்பிப் பார்த்தால்....

மீண்டும் மீண்டும்
புதிய தேடல்களே
மீளுகின்றன

வாழ்க்கை மட்டும்
இங்கு மீண்டபாடில்லை

மீண்டும் மீண்டும்
தொலைந்தாலும்
பயணம் மட்டும்
தொடர்கிறது

மரணம் கூட
இங்கு ஒரு முடிவல்ல
மற்றுமொரு
பயணத்தின் துவக்கம்

மன அசைவுகளின் அதிர்வுகள்
ஞாபகங்களை மட்டும்
இங்கு மீட்டெடுக்கின்றன

- சேகர்கவிதன்

கவிதை

எச்சங்கள்

காதற் காலங்களின்

சில காத்திருப்புகள்

இன்று என்னவோ

நினைவுகளின் எச்சங்களாக

நெருடுகின்றன.....

பக்கத்து வீட்டுக் காதல்

பள்ளிக்கூடக் காதல்

கல்லூரிக் காதல்

பணியிடத்துக் காதல்

பெற்றோர் பார்த்தக் காதல்

கல்யாணக் காதல்

இப்படியாகப்

புதுப்புது பரிமாணங்கள்

மனம் மட்டும் நிலா

நினைவு மட்டும் வானம்

உணர்வுகள் மட்டும் அலை

தள்ளாடும் உடல்

ஊசலாடும் உயிர்

நிலையற்றக் காதல்

விழியோரம்

தேங்கிக் கிடக்கிறது

விழும்

ஒவ்வொரு துளியிலும்

காதலின் முகம்

தாலி கட்டியவள்

அழுகிறாள்

என் விழிக்கண்ணீருக்குக்

காரணம்

அவள்தானென்று.......

-  சேகர் கவிதன்